Psa 126 | WNC | STEP | Aminu kunduta kauutde pewan maikumang. Siwan ngana tapduu Buyambam tapata Saion gatu ninipakapbut kopatangu ninda anzing natapbumang. Mia moo ba kaamang ngang natapbumang.

Psalms 126

Kau Isrel aminda taike miti yot gwene kopnanga kap taknga.

1 Aminu kunduta kauutde pewan maikumang. Siwan ngana tapduu Buyambam tapata Saion gatu ninipakapbut kopatangu ninda anzing natapbumang.
Mia moo ba kaamang ngang natapbumang.
2 Unzingge ninda minu kumzang mikumang. Mike kap taiyuuk kumzang bakngakumang.
Siwan katum aminu kepna kepna nana aminda kake anzing yaking,
“Buyambam tapata Isrel nana gatayamunangge puya buyambam siknga tasikut,” ngang yaking.
3 Siakande siknga. Buyambam tapata nin gatanimunangge puya buyambam siknga tasikut.
Unzingge ninu musip gwaang siknga nataamang.
4 Buyambam tapa, gata ninu tupa yukumang binga apman kaya ina unzakan yutnimde gata gatanimuyo.
Sike wa unzing gapma zongaatang nana wawaa siwan ngana keu waomune yangga apaapa akoke zipmake kukaing binga siyok.
5 Sike aminu kwanamna siyuuk nanam zak kwainingu,
waakwau damana gwa siningu kuku apbakngake pakapuyuuk kap taining.
6 Siakande siknga. Aminu kwanamna siyuuk
nanam zaknga utnake kwaiwiu,
masande nanamu damana gwa siningu
kuku utnake ataibakngayuuk pakapik.